MTI e CiviKos lidhin memorandum

2 Shkurt 2017 - 17:45      

Ministrja e Tregtisë dhe Industrisë, Hykmete Bajrami dhe drejtoresha ekzekutive në Platformën CiviKos, Valdete Idrizi, nënshkruan sot marrëveshjen për bashkëpunim

Kjo marrëveshje ka për qëllim vendosjen e bashkëpunimit në mes Ministrisë së Tregtisë dhe platformës CiviKos, lidhur me çështjet që kanë të bëjnë procedurat e prokurimit publik, mbrojtës se konsumatorëve si dhe infrastrukturës së cilësisë.

Ministrja Bajrami theksoi se kjo marrëveshje është e rëndësishme dhe hap rrugën që MTI të mundësojë përfshirjen e shoqërisë civile në zhvillimin e legjislacionit brenda fushëveprimit të MTI-së, monitorimin e zbatimit të legjislacionit, që ndërlidhet me vëzhgimin e procedurave të prokurimit, mbrojtjen e të drejtave të konsumatorit, si dhe infrastrukturën e cilësisë,duke siguruar transparencë të plotë gjatë gjithë procesit si dhe llogaridhënie me rastin e zbatimit të përgjegjësive ligjore që bien në kompetencë të MTI-së. Më tej, ministrja theksoi se përfshirja e shoqërisë civile në monitorimin e aktiviteteve të lartpërmendura është e rëndësishme për të siguruar qeverisje të mirë dhe ofrim të shërbimeve efektive dhe të qëndrueshme për qytetarët e Republikës së Kosovës.

Në anën tjetër, Valdete Idrizi, drejtoreshë ekzekutive në Platformën CiviKos, theksoi se “Nënshkrimi i kësaj marrëveshje është një kontribut direkt i zbatimit të Strategjisë së bashkëpunimit në mes të institucioneve të administratës shtetërore në njërën anë dhe shoqërisë civile në anën tjetër”, tha drejtoresha Idrizi.

Po ashtu, Idrizi theksoi se me vite sektori i shoqërisë civile ka qenë i zëshëm në kërkimin e transparencës.
“Ne jemi të interesuar të avancojmë bashkëpunimin me institucionet në mënyrë që të rrisim edhe besimin e qytetarëve te institucionet publike”, theksoi ajo.

© KOHA. Të gjitha të drejtat janë të rezervuara.