Raporti rrogë - çmim, vështirë i përballueshëm [video]

1 Shkurt 2017 - 19:15      

Krahasuar me të ardhurat dhe pensionet mujore të qytetarëve, çmimet e produkteve ushqimore llogariten të jenë të larta, raporton KTV.

Për të mbushur një shportë familjare me produktet më elementare të konsumit, nevojiten 115 euro.

Por, kur llogariten edhe shpenzimet e tjera, siç janë rryma, uji e veshmbathja, familjarët nuk mund t’ia dalin në asnjë mënyrë.
Selatin Kaçaniku thotë se raporti rrogë – çmim në vendin tonë është vështirë i përballueshëm.

Zyrtarë të Agjencinë së Statistikave të Kosovës thonë se rezultatet e fundit të dala tregojnë për një rritje të çmimeve prej 0.3 për qind.
Sipas Ilir Berishës nga kjo Agjenci, një rritje e tillë, e cila konsiderohet e lehtë, nuk ndikon shumë në xhepin e konsumatorit.
Por, mbrojtësit e konsumatorit thonë se kjo përqindje siç e quajnë zyrtarë të kësaj agjencie të vogël, kur del nga zyrat e saj, konsumatorit i kushton deri në 30 për qind më shtrenjtë. Ata që në fund po e paguajnë koston janë qytetarët që thonë se as vetë nuk e dinë se si po ia dalin. Njohës të çështjeve ekonomike vlerësojnë se në mosstabilizimin e tregut ku shumë çmime të produkteve janë më të larta se në disa vende të rajonit dhe Evropës ndikojnë shumë faktorë.

Raporti rrogë - çmim, vështirë i përballueshëm by kohanet

© KOHA. Të gjitha të drejtat janë të rezervuara.