Prishtina (nuk) është Serbi

1 Shkurt 2017 - 12:22      

Një lexues ka dërguar në Koha.net një fotografi të biletës të Adria Airways, në të cilën aeroporti ndërkombëtar “Adem Jashari” del se ndodhet në “Pristina, Serbia”. Ai nuk saktësonte ku e kishte blerë atë biletë, por shprehej i zemëruar që në të figuronte sikur Prishtina ndodhet në Serbi dhe jo në Republikën e Kosovës.

Koha.net ka pyetur në EuroSky nëse kishin dijeni për këtë çështje. Besim Morina na sqaroi se në agjencinë e tij nuk mund të blihen bileta, në të cilat do të figuronte se Prishtina ndodhet në Serbi. Ai tha se para disa vitesh kishin vënë re këtë defekt dhe menjëherë kishin reaguar e më pas edhe konsultuar me Autoritetin Rregullativ të Aviacionit Civil të Kosovës, kështu që defekti ishte mënjanuar.

Në fakt, ka sqaruar ai, agjencitë që punojnë përmes sistemit Amadeus, që është një sistem global i rezervimit të biletave me avionë, del Pristina International (INTL XK), ndërsa si kod i përkohshëm del Pristina IMLT. Mirëpo rezervimet, përkatësisht në biletat e blera online vazhdon të shfaqet “Pristina Serbia”, si në rastin e Adria Airways, të dërguar nga lexuesi i Koha.net. 

© KOHA. Të gjitha të drejtat janë të rezervuara.