Haxhiu: Përfshirja e Thaçit në dialog i bën mirë Kosovës

31 Janar 2017 - 23:56      

Deputeti i PDK-së, Bekim Haxhiu, thotë se ndryshimi i formatit në dialogun Kosovë – Serbi në Bruksel, me nivel të lartë të udhëheqësve, është bërë me arsye që në fund të ketë njohje reciproke të të dy shteteve.

Haxhiu në Interaktiv të KTV-së ka thënë se përfshirja e presidentit Hashim Thaçi në dialog me Serbinë i bën mirë Kosovës, sepse, sipas tij, “Thaçi është dialogues i spikatur”.

“BE ka vendosur që të ketë nivel bisedimesh edhe më të lartë që formati të ndryshojë që dialogu të përfundojë me njohjen reciproke. E njohim Thaçin si dialogues të spikatur. Thaçi do ta përfaqësojë Kosovën mirë në dialog e Serbinë nuk kemi mundur ta bindim kurrë, e ka bindur lufta e UÇK-së që të shporret nga këtu”, ka thënë Haxhiu.

I pyetur nëse Thaçi është dialogues më i mirë se kryeministri Isa Mustafa, Haxhiu ka deklaruar: “Mustafa nuk e ka karizmin e Thaçit, është e qartë”.

Ai ka vlerësuar edhe ministren për Dialog Edita Tahiri duke thënë se edhe ajo është politikane e spikatur.

© KOHA. Të gjitha të drejtat janë të rezervuara.