Meta fajëson partitë maqedonase për krizën politike, përkrah platformën shqiptare

31 Janar 2017 - 17:19      

Kreu i Kuvendit të Shqipërisë, Ilir Meta, ka shprehur shqetësimin e tij lidhur me situatën aktuale në Maqedoni, duke thënë se Maqedonia është nyja më delikate e rajonit.

Ai ka theksuar se shkak për këtë krizë janë partitë më të mëdha maqedonase, ndërsa ka përshëndetur platformën e përbashkët të partive shqiptare duke kërkuar që të jenë faktor kyç për stabilitetin e Maqedonisë e cila do sillte rezultate mbi integrimin evropian dhe euro atlantik të vendit.

“Maqedonia prej disa vitesh ka vuajtur nga një krizë politike dhe institucionale edhe zgjedhore për fat të keq, dhe burimi i kësaj krize ka qenë lufta e ashpër mes dy partive kryesore maqedonase. Për fat të mirë zgjedhjet e fundit u pranuan nga të gjitha forcat politike dhe kjo është gjë pozitive për Maqedoninë”, ka thënë Meta, përcjell kp. “Kam përshëndetur platformën e forcave politike shqiptare që është një hap pozitiv, që rrit detyrimin e tyre për të bashkëpunuar më shumë me njëra tjetrën në interes të të drejtave të shqiptarëve në Maqedoni”, ka thënë Meta.