Bajrami kërkon nga “Toka” të jenë partnerë në ngritjen e cilësisë në arsim

31 Janar 2017 - 15:27      

Ministri i Arsimit Shkencës dhe Teknologjisë, Arsim Bajrami dhe drejtoresha e OJQ –së “Toka”, Jehona Gjurgjeala, nënshkruan memorandum mirëkuptimi për implementimit e projektit “Punëtoritë e Demokracisë/DEMOS-TI” –projekt ky i Kuvendit të Kosovës.

Qëllimi i këtij Memorandumi është të krijojë një marrëdhënie zyrtare të bashkëpunimit në mes të MAShT dhe OJQ-së “Toka” në lidhje me implementimin e projektit “Punëtoritë e Demokracisë/DEMOS-TI” me nxënësit në shkollat e Kosovës.

Ky projekt synon që me nxënësit e shkollave të Kosovës, përmes përmbajtjes interaktive, të stimulojë interesimin për proceset demokratike.

Ministri Bajrami e vlerësoi si të rëndësishëm implementimin e këtij projekti në shkollat e Kosovës, ku nxënësit do të përfitojnë njohuri për rregullat e demokracisë, funksionimin e Parlamentit dhe organeve tjera shtetërore, njohjen nga afër me ambientet zyrtare si dhe mundësi të shumta për komunikimi.

Bajrami, gjatë vizitës në ambiente të OJQ-së “Toka”, ka zhvilluar një bisedë të shkurtër me nxënësit të cilët ishin në një punëtori ditore. Ata u interesuan për aktivitetet e Ministrisë së Arsimit, zhvillimin e arsimit, aftësimin profesional dhe perspektivën e tyre, njëherësh shprehën dëshirat se çfarë do të dëshironin të bëheshin një ditë.

Ministri ka përgëzuar OJQ-në “Toka” për aktivitetet që zhvillon dhe ka ofruar mbështetjen e MAShT-it për implementimin e këtij projekti njëherësh i ftoi ata që të jenë partnerë në ngritjen e cilësisë në arsim. 

© KOHA. Të gjitha të drejtat janë të rezervuara.