Të mërkurën vazhdon dialogu Kosovë-Serbi pa Thaçin e Nikoliqin

28 Janar 2017 - 22:32      

Përfaqësuesja e Lartë për Punë të Jashtme dhe Politika të Sigurisë, njëherësh edhe nën-presidente e Komisionit Evropian, Federica Mogherini, ka ftuar kryeministrin e Kosovës, Isa Mustafa dhe atë të Serbisë, Aleksandër Vuçiq, në Bruksel për një takim tjetër të dialogut të nivelit të lartë që ka për qëllim normalizimin e marrëdhënieve mes Prishtinës dhe Beogradit.

Takimi i radhës do të zhvillohet të mërkurën më 1 shkurt, 2017.

“Ky takim është vazhdimi i atij të mbajtur më 24 janar ku të dyja palët u pajtuan që të lënë tensionet prapa dhe të përqendrohen në punë përbrenda dialogut të ndërmjetësuar nga BE”, thuhet në njoftimin e zyrës së Mogherinit, raporton Koha.net.

“Përfaqësuesja e Lartë pret me padurim vazhdimin e diskutimeve, për çështje me rëndësi dhe diskutimet për zbatimin e marrëveshjeve të arritura më herët si dhe që ta çojnë përpara dialogun. Progresi drejt BE-së është i lidhur për të dyja, për Kosovën dhe Serbinë, përbrenda dialogut”, ka përfunduar njoftimi i zyrës së Mogerinit.

Duhet theksuar se në këtë takim nuk janë ftuar dy krerët e shteteve dialoguese, Hashim Thaçi dhe Tomisllav Nikoliqi, të cilët në takimin e 24 janarit ishin prezentë.  

© KOHA. Të gjitha të drejtat janë të rezervuara.