Bajrami: Procesi i dialogut ka bankrotuar

24 Janar 2017 - 20:19      

Dialogu Kosovë – Serbi ka kohë që nuk prodhon asgjë. Takimin e sontëm mes dy palëve, kryeredaktori i Kohës Ditore, Agron Bajrami e quan reagim emergjent të BE-së.

Ai në Rubikon të KTV-së theksoi se kjo vjen si pasojë e zhvillimeve të fundit të Serbisë karshi Kosovës. “Reagim emergjent i BE-së për të shpëtuar fasadën e një procesi që ka kohë që ka bankrotuar, e që është dialogu. Vetë BE-ja pas arrestimit të Haradinajt, murit në Mitrovicë dhe trenit të famshëm, duket se e kanë vërejt që dialogu nuk është duke prodhuar asgjë më dhe është në gjendje të rënies së lirë”, ka thënë ai.

“Në këtë moment nuk mund të flasim për asnjë proces të normalizimit por tensionimit. Ajo çka mund të shpëtohet, të shpëtojmë dukjen e një procesi, një dialog që mund të normalizojë marrëdhëniet dikur”.
Sipas Bajramit, qëllimi i dialogut duhet të jetë njohja reciproke.
“Përmbajtja e dialogut ka qenë gabim. Qëllimi patjetër duhet të jetë njohja reciproke. Edhe në Serbi ka zëra të arsyeshëm që flasin për njohjen e Kosovës”, ka thënë Bajrami.

© KOHA. Të gjitha të drejtat janë të rezervuara.