Kush thotë se “me rastin Haki Imeri” po hutohet opinioni [video]

24 Janar 2017 - 19:09      

Familja e Haki Imerit i ka shkruar letër kryeprokurorit të Speciales, duke kërkuar që të zbardhet vrasja e prindit të tyre, raporton KTV. Në kohën e vrasjes, Haki Imeri ishte anëtar i LDK-së.

Në letër përmendet se vrasja u krye në kohën e qeverisjes së Hashim Thaçit si ish-kryeministër i Qeverisë së Përkohshme dhe ish-ministrit të mbrojtjes, Rexhep Selimi.

Një takim me Presidentin e vendit, pastaj një akademi që ai e organizoi në përkujtim të Haki Imerit dhe dekorata për të “Hero i Kosovës”, ka bërë që Imer Imeri tani të ndërrojë mendje për Presidentin.

Flet për të në superlativ dhe thotë se Thaçi e kishte bindur kur i shkroi kryeprokurorit Lumezi, duke i kërkuar që të hetojë vrasjet e pasluftës.

Imeri në një intervistë për KTV-në tregon se takimi me presidentin e vendit ishte organizuar me kërkesë të Thaçit në muajt e fundit, kur Imeri e akuzonte rëndë presidentin si të përfshirë në vrasjen e vëllait të tij.
Familja Imeri tashmë ka qëndrime të ndara.
Në akademinë e organizuar nga Presidenca, fëmijët e Haki Imerit nuk ishin pjesëmarrës.
Ata ndaras kanë kërkuar që rasti të zgjidhet në rrugë institucionale dhe tani i kanë shkruar edhe letër kryeprokurorit Special David Schwendiman.

Aty kërkojnë zgjidhjen e vrasjes së babait të tyre, duke kujtuar që vrasja u krye në nëntor të 1999-ës kur në krye të Qeverisë së Përkohshme ishte Hashim Thaçi dhe ministër i Mbrojtjes, Rexhep Selimi.
Rexhep Selimi, emri i të cilit përmendet në letrën dërguar në Hagë, thotë se nuk di gjë për rastin dhe sipas tij as letra nuk është e shkruar nga vetë familja.

Me këto veprime Selimi thotë se vetëm po hutohet opinioni.
KohaVisioni ka pyetur edhe Zyrën e Presidentit Hashim Thaçi për apostrofimin që familja ia bën në letrën dërguar në Gjykatën Speciale, por nuk është kthyer përgjigje.
Përgjigje nuk ka kthyer as Zyra e kryeprokurorit Schwendiman nëse e ka pranuar këtë letër dhe nëse do ta shqyrtojë atë.

Kush thotë se “me rastin Haki Imeri” po hutohet... by kohanet

© KOHA. Të gjitha të drejtat janë të rezervuara.