Opozita kërkon ndaljen e dialogut me Serbinë, Kosova nuk trajtohet barabartë

24 Janar 2017 - 13:20      

Tri partitë opozitare në një konferencë për media kanë njoftuar për iniciativën e mbajtjes së një seance të jashtëzakonshme në Kuvendin e Kosovës për të diskutuar rreth dialogut me Serbinë, raporton Koha.net.

Deputetja e Nismës, Valdete Bajrami ka thënë se deri më tani mungojnë nëntë nënshkrime për të siguruar mbajtjen e seancës së jashtëzakonshme. Arsyeja e kësaj e mbajtjes së kësaj seance është shkuarja e kryeministrit Isa Mustafa dhe presidentit Hashim Thaçi në dialog, në kohën kur Kosova është përballur me trenin rus, murin në Mitrovicë dhe mbajtjen e Ramush Haradinajt në Francë me urdhërarrest të Serbisë.

“Mustafa dhe Thaçi kanë humbur integritetin. Konsiderojmë se ky dialog i udhëhequr nga Thaçi dhe Mustafa duhet të ndalen”, ka thënë deputetja Bajrami.

“U bëjmë thirrje deputetëve të nënshkruajnë këtë iniciativë sepse ky dialog po i shkakton vetëm dëme Kosovës dhe për këtë e dimë që pajtohen edhe shumë deputet të pozitës”, ka shtuar ajo.

Shefi i grupit parlamentar të Lëvizjes Vetëvendosje, Glauk Konjufca ka thënë se dy krerët e shtetit kanë shkuar për të marrë pjesë në dialog pa pyetur Kuvendin e Kosovës.

“Qysh është e mundur që krerët e shteti shkojnë krye në vete të bëjmë kompromise për Kosovën pa na pyetur neve, Kuvendin pra opozitën. Madje në për këtë takim dëgjuam nga mediat”, ka thënë Konjufca. 

© KOHA. Të gjitha të drejtat janë të rezervuara.