Matoshi: Dialogu të fokusohet në nënshkrim të një Pakti të Paqes

22 Janar 2017 - 20:33      

Publicisti dhe analisti politik kosovar Halil Matoshi, ka vlerësuar se dialogu do të ishte i pakuptimtë pa përfundimin e konfliktit në mes Kosovës dhe Serbisë.

Matoshi ka theksuar se është interes kombëtar i Kosovës që të vazhdojë procesin e normalizimit të marrëdhënieve me Serbinë, por se sipas tij tash dialogu duhet të fokusohet në një tjetër çështje.

“Dialogu tashti duhet të fokusohet në normalizimin e marrëdhënieve mes dyja shteteve duke i shmangur retorikat e luftës dhe duke shkuar në drejtim të nënshkrimit të një Pakti Paqeje si dokument obligativ. Përndryshe dialogu i përjetshëm për të njëjtat tema s’ka kuptim”, tha Matoshi në një prononcim për KP.

Sipas tij, për çështjet e mirëqenies së serbëve në Kosovë dhe shqiptarëve në Luginë të Preshevës mund të bisedohet pasi të arrihet paqja e cila Serbisë ia mundëson përmbushjen e detyrave që burojnë nga Kapitulli 35-të i negociatave me BE-në, kurse Kosovës ia mundëson marrjen e ulëses në OKB.