“Skenarët si ai me trenin e murin mund të përsëriten”

21 Janar 2017 - 09:35      

Skenarë e provokime të ngjashme si ai me tentimin për të sjellë në Kosovë trenin me mbishkrime nacionaliste serbe, si dhe ndërtimin e murit afër urës së lumit Ibër, nga ana e Serbisë, mund të përsëriten, ka thënë kryetari i Komisionit parlamentar për mbikëqyrjen e Agjencisë Kosovare të Inteligjencës, Haxhi Shala.

Sipas tij, skenarët e tillë që mund të destabilizojnë vendin, Serbia i ka detyrë nga shërbimet ruse, shkruan sot Koha Ditore. Këto komente Shala i ka bërë pas një takimi që anëtarët e Komisionit kanë zhvilluar me drejtorin e Agjencisë Kosovare të Inteligjencës, Agron Selimaj.

Pas takimit, i cili ka zgjatur rreth dy orë e i cili është mbajtur pa praninë e mediave, Shala ka thënë se e kanë ftuar Selimajn që t’u raportojë për situatat e krijuara, si dhe skenarët e mundshëm të Serbisë për të destabilizuar vendin.

“Morëm informacione se situata e sigurisë është e qëndrueshme në vend përderisa institucionet e sigurisë janë në nivel të detyrës”, ka deklaruar ai.

Sipas deputetit të Nismës për Kosovën, skenarë të tillë nga ana e Serbisë mund të përsëriten.

Sipas tij, Policia e Kosovës është duke bashkëpunuar ngushtë me Agjencinë e Inteligjencës dhe se janë në gjendje gatishmërie për t’u përballur me çfarëdo situate. (Artikullin e plotë mund ta lexoni në numrin e sotëm të Kohës Ditore)

© KOHA. Të gjitha të drejtat janë të rezervuara.