Daçiq i përgjigjet me Kosovën kërkesës së Maqedonisë për të mos iu referuar me FYROM

20 Janar 2017 - 17:44      

Ministri i Punëve të Jashtme i Serbisë, Ivica Daçiq, i është përgjigjur kërkesës nga Shkupi që Beogradi më mos ta përdorë termin Ish Republika Jugosllave e Maqedonisë. E ka përdorur analogjinë me Kosovën.

Ministria e Punëve të Jashtme e Maqedonisë ka kërkuar nga Serbia që mos ta përdorë më emrin e “turpshëm” IRJM por me emrin e saj zyrtar Republika e Maqedonisë.

“Nëse veç protestojnë për këtë atëherë çka duhet të bëjmë ne për shkak se ata e kanë pranuar Kosovën shtet dhe kanë votuar për të në UNESCO”, ka thënë Daçiq për mediat serbe.

Daçiq ka pyetur pse Maqedonia nuk e lë OKB-në, Këshillin e Evropës, OSBE-në dhe takimet e BE-së.

“Pse ulet me atë emër, ndërsa tani i bëhet problem për neve. Serbia nuk ka ndryshuar qëndrim me pranimin e Maqedonisë, por për Serbinë është fyese dhe e turpshme kur ata thonë ‘Republika e Kosovës’”, ka thënë Daçiq.