AGK akuzon Vetëvendosjen për fushatë linçuese ndaj drejtuesve të RTK-së

20 Janar 2017 - 11:42      

Asociacioni i Gazetarëve të Kosovës, përmes një reagimi, e kundërshton fushatën linçuese të subjektit politik Vetëvendosje ndaj drejtorit të transmetuesit publik, Mentor Shala dhe kryeredaktorit Ridvan Berisha.

Fatkeqësisht ky subjekt opozitar, që synon të vijë në pushtet, prej muajsh linçon publikisht drejtuesit e RTK-së. Ne kemi pritur që Vetëvendosje të reflektonte pas disa gabimeve që ka bërë muajt e fundit duke akuzuar, linçuar dhe kërcënuar gazetarë.
Kjo sjellje më se paku i ka hije një subjekti politik që mëton të promovojë lirinë e shprehjes dhe mediave në Kosovë.
Ne kërkojmë nga Vetëvendosja që të ndalë këtë formë të linçimit dhe akuzave ndaj drejtuesve të RTK-së, duke inkurajuar këtë subjekt politik që t’iu drejtohet organeve kompetente nëse pretendon se ka fakte për atë që thotë. Po ashtu inkurajojmë edhe dy kolegët Shala e Berisha që të fillojnë ndjekjen e rrugëve ligjore në lidhje me këtë rast, thuhet në fund të reagimit të Asociacionit të Gazetarëve të Kosovës.

© KOHA. Të gjitha të drejtat janë të rezervuara.