Akuakultura organike, biznes që po lulëzon vitet e fundit në Shqipëri

17 Janar 2017 - 15:58      

Akuakultura biologjike ose organike një degë e re që po merr zhvillim vitet e fundit në vendin tone, shihet si një biznes mjaft fitim prurës jo vetëm për plotësimin e kërkesave të tregut vendas me produkte deti, por edhe për eksport.

Operatorët e sektorit thonë se rritja dinamike për prodhime deti “bio” është pasojë e shtimit të shpejtë të konsumit të prodhimeve të detit në vend, kjo falë zgjerimit të kulturës së ushqyerjes së konsumatorëve.

Kultivimi ose mbarështimi i organizmave ujore si peshq, molusqe, krustacetë dhe bimë ujore nëpërmjet përdorimit të teknologjive, synon rritjen e prodhimit në këtë sektori përtej kapaciteteve natyrore në mjedis.

Sipas eksperteve të fushës, akuakulturë biologjike/organike, është aktiviteti që karakterizohet nga reduktimi i ndikimeve negative në mjedis, mos përdorimi i hormoneve dhe OMGJ-ve, respektimi i dendësisë së kafshëve në rezervuar, përdorimi i ushqimeve organike etj.

Këto veçori, të cilat kontrollohen edhe nga inspektoret ushqimor, bëjnë dallimin me prodhimet e tjera të akuakulturës.

Rezervatet e ngritura për këtë qëllim janë kryesisht në zonat bregdetare të vendit, si Durrës, Lezhë, Shkodër, Vlorë dhe Sarandë. Me mundësi të mëdha edhe për eksport, ky biznes konsiderohet si një nga më potencialët në vend.

Ndërkohë që dhe ministria e Bujqësisë po shtron mbështetjen për këtë sektor me qëllim zhvillimin e tij edhe në perspektivë.