Java e humbur në gjysmëvjetorin e dytë do të kompensohet

16 Janar 2017 - 12:01      

Me rastin e fillimit të gjysëmvjetorit të dytë të vitit shkollor 2016/2017, ministri i Arsimit, Shkencës dhe Teknologjisë, Arsim Bajrami i shoqëruar nga drejtorja e Drejtorisë Komunale të Arsimit në Prishtinë, Arbërie Nagavci, vizituan shkollën fillore dhe të mesme të ulët “Iliria” në Prishtinë, njofton kumtesa ministrore, transmeton Koha.net.

Ai me këtë rast ka theksuar se, në të gjitha shkollat e Republikës së Kosovës sot ka filluar gjysmëvjetori i dytë me një javë humbje dhe se Ministria e Arsimit do të bëjë planin e kompensimit të kësaj vonese për shkak të situatës klimatike dhe rreziqeve nga gripi.

Bajrami e ka vlerësuar shumë të rëndësishëm fillimin e këtij gjysmëvjetori, sa i përket mobilizimit të përgjithshëm të shkollave, të mësimdhënësve, nxënësve dhe drejtorëve për të ngritur cilësinë.

Duke folur edhe për ngritjen e pagave për mësimdhënësit e përkushtuar në ngritjen e cilësisë në arsim, Bajrami tha se këto ditë do të vendosim edhe një sistem të stimulimit të mësimdhënësve përmes pagave.

Arbërie Nagavci, bëri të ditur se në komunën e Prishtinës ka filluar mësimi në të gjitha shkollat dhe se gjatë periudhës së pushimeve është themeluar ekipi komunal për sigurimin e cilësisë. 

© KOHA. Të gjitha të drejtat janë të rezervuara.