Në Beograd dëgjohet edhe kjo: Prishtina e ka në plan pushtimin e veriut!

16 Janar 2017 - 10:04      

Kthimi mbrapshtë i trenit nacionalist serb nga Kosova vazhdon ta mbajë në këmbë politikën ditore serbe me përplot retorikë kundër shqiptare në Kosovë, transmeton Koha.net.

Kështu, kryetari i Këshillit për Kosovën në Kuvendin e Serbisë Milovan Drecun ka deklaruar se ngjarjet rreth trenit janë pasojë e presionit afatgjatë ekonomik e politik që Prishtina bën ndaj serbëve.

Ai mendon se këto ngjarje kanë lidhje me faktorët ndërkombëtarë, ndërsa pret që nga “sjellja e administratës së re amerikane të varet zhvillimi i mëtejmë i ngjarjeve përreth Kosovës”.

Drecun ka theksuar se ka plane të Prishtinës për “pushtimin e veriut dhe instalimin e institucioneve të saj, dhe, kjo sipas tij, dëshmon militarizimin veriut: ”Në radhë janë Podujeva, Bajgora, Mitrovica jugore”, ka thënë ai pa treguar se të gjitha këto janë pjesë përbërëse të Kosovës dhe se nuk ka si të ndodhë që Kosova ta pushtojë Kosovën .

Sipas Drecunit, “të gjitha bëhen për të zvarritur formimin e Asociacionit të Komunave serbe, i cili, sipas tij bën boshtin e Marrëveshjes së Brukselit”.

Natyrisht Drecunit dhe zyrtarëve të tjerë nga Serbia nuk u ka pëlqyer gatishmëria e institucioneve dhe e njësive policore të Kosovës për ta mbrojtur territorin dhe sovranitetin e vendit. Ai, madje, këtë gatishmëri e ka quajtur terrorizëm.

© KOHA