18 vjetori i masakrës së Reçakut [video]

15 Janar 2017 - 19:19      

Me homazhe te kompleksi memorial në Reçak janë përkujtuar viktimat e njërës ndër masakrave më të mëdha që pati ndodhur në këtë fshat më 15 Janar 1999.

Kryeministri Isa Mustafa, theksoi se masakra e Reçakut është dëshmi e mizorisë dhe gjenocidit të forcave serbe gjatë luftës në Kosovë, raporton KTV.

Ish-ambasador i OSBE-së në Prishtinë, William Walker i cili kishte parë nga afër trupat e të masakruarve në Reçak edhe pas 18-vjetësh e kujton me emocion ditën e 15 Janarit.

Në Reçak për homazhe ishte edhe deputeti i Kuvendit të Kosovës nga radhët e Vetëvendosjes, Albin Kurti.

Ai theksoi se edhe 18 vjet pas masakrës, vazhdon të vonohet drejtësia.

Kurse, lideri i Nisma-s për Kosovën, Fatmir Limaj, pas homazheve në Reçak, deklaroi se dëshmia më e mirë se cili ishte plani i shtetit serb për shqiptarët është Reçaku.

Sipas Limajt, plani serb ishte për shfarosje, shkatërrim të dinjitetit dhe largimin e njerëzve nga vendi atdheu i tyre.

Masakra e Reçakut e 15 janarit të vitit 1999, e pati tronditur publikun ndërkombëtar dhe diplomacinë perëndimore.

Në këtë masakër ishin vrarë në mënyrën më mizore 45 shqiptarë.  

© KOHA. Të gjitha të drejtat janë të rezervuara.