“Nëse përsëriten incidente të tilla do të mbrohemi bashkë me shtetin e Serbisë”

15 Janar 2017 - 12:33      

Qindra qytetarë serbë janë tubuar në Mitrovicën e Veriut për të protestuar prezencën e një nate më parë të forcave speciale të Policisë së Kosovës në pikën kufitare në Jarinjë.

Sheshi “Car Llazar” është nikoqir i tyre. Ata po e cilësojnë këtë veprim si tentim për ta frikësuar popullatën serbe në këtë pjesë të vendit, raporton KTV.

Para protestuesve ka folur Alenksnadër Piriq, teksa ka thënë se “jemi këtu sepse serbët në Kosovë po përballen me mungesën e lirisë dhe dhunën e pranishme, që po tentojnë ta tregojnë liderët nga lartë”.

“Ne nuk kemi të drejtë të lëvizim dhe të marrim vet vendimet”, ka thënë ai.

Edhe Zoran Todiq, nga Lepozaviqi, ka thënë se “qëllimi i Leposaviqit është një vendim i pakuptueshëm i Prishtinës”.

“Dje është evituar një eskalim i rëndë duke iu falënderuar Vuçiqit. Mesazhi i Prishtinës është i qartë që të na rrënojë jetën në këtë pjesë, por nëse ata mendojnë se jemi të frikësuar e kanë gabim. Derisa Qeveria e Serbisë është me ne, askush nuk mund të na frikësojë”, ka thënë Todiq, përcjell Koha.net. “Kosova është zemra e Serbisë dhe ashtu do të jetë edhe në të ardhmen”, ka thënë Todiq.

Tutje ai ka thënë se “nëse përsëritet një incident i tillë u themi që do të organizohemi bashkë me shtetin serb që ta mbrojmë shtetin tonë”.

Në protestë pos flamujve serb ka edhe aso të kombinatit “Trepça”.

Lexo edhe: Ka nisur protesta e veriorëve në kundërshtim të prezencës se ROSU-s atje [video] 

© KOHA. Të gjitha të drejtat janë të rezervuara.