AAK e quan të vonuar reagimin e Qeverisë për trenin

14 Janar 2017 - 21:58      

Aleanca për Ardhmërinë e Kosovës e ka quajtur të vonuar reagimin e Qeverisë së Kosovës rreth trenit që ishte nisur sot nga Beogradi dhe destinacion kishte veriun e Kosovës.

AAK gjithashtu ka thënë se provokimet e njëpasnjëshme të Serbisë janë si rezultat i qasjes së gabuar dhe nënshtruese në bisedime, transmeton Koha.net.

“Ngjarja me trenin, është provokim i radhës dhe përpjekje për destabilizim të situatës në Kosovë. Provokimet e njëpasnjëshme të Serbisë ndaj Kosovës, janë rezultat i politikës nënshtruese të Qeverisë së Kosovës dhe qasjes së gabuar në bisedimet me Beogradin. Reagimi i Qeverisë për këtë ngjarje ka qenë tepër i vonuar”, thotë AAK përmes një komunikate për media.

AAK më tutje thotë se rasti Haradinaj dhe ky i trenit janë i njëjti skenar që kanë për qëllim ka destabilizimin e Kosovës.

“Dy sulme të njëpasnjëshme të Serbisë ndaj Kosovës, brenda një kohe të shkurtër, fletarresti ndaj Haradinajt dhe "shoë me trenin", janë pjesë e të njëjtit skenar që për qëllim ka destabilizimin e Kosovës dhe cenimin e lirisë së saj”, thuhet në komunikatë.

Më tutje në komunikatë AAK thotë se bisedimet duhet të ndalen menjëherë me Serbinë.

“Kjo fushatë incidentesh e provokimesh të hapura të Serbisë ndaj Kosovës, duhet të marrë fund menjëherë dhe hapi i parë i Qeverisë së Kosovës, duhet të jetë ndalja e menjëhershme e bisedimeve me Serbinë dhe krijimi i strategjisë së përballjes me sulmet, tashmë të hapura të Serbisë kundër Kosovës”, thuhet në komunikatë.

Treni është kthyer tani për në Beograd, përderisa ROSU janë duke qëndruar ende në Jarinje.

© KOHA. Të gjitha të drejtat janë të rezervuara.