Tahiri i kërkon BE-së që ta ndalë trenin e Serbisë në Kosovë

13 Janar 2017 - 18:52      

Përmes një njoftimi për media të zyrës së ministres për Dialog, Edita Tahiri, bëhet me dije se ajo, sot kërkoi nga BE-ja që ta ndalë trenin ilegal të Serbisë në shtetin e Kosovës, të cilin Serbia e ka paralajmëruar për nesër, siç thuhet në komunikatë, si një provokim të radhës për destabilizimin e situatës në Kosovë.

“Serbia po vazhdon me provokime të rënda ndaj Kosovës në kundërshtim me frymën e dialogut të Brukselit për normalizimin e marrëdhënieve fqinjësore mes dy shteteve. Paralajmërimi i bërë për të lansuar linjën e re ilegale Beograd - Mitrovicë që nga dita e nesërme, është një ndërhyrje agresive në sovranitetin shtetëror të Kosovës dhe një dëshmi tjetër se Serbia po dëshiron ta destabilizojë Kosovën”, ka theksuar ministrja Tahiri, citohet në komunikatë.

Sipas Tahirit, Serbia po bëhet rrezik për paqen dhe stabilitetin në rajon dhe faktori ndërkombëtar duhet ta ndalë Serbinë.

“Serbia ka agjenda të rrezikshme, që duhet të na shqetësojnë të gjithëve, edhe Kosovën edhe partnerët ndërkombëtarë. Tashmë ky është një provokim i hapur kundër Kosovës, që tregon se Serbia ka dalë hapur me politika agresive që kërcënojnë sovranitetin dhe integritetin territorial të Kosovës dhe sigurinë nacionale të saj”, deklaroi ministrja Tahiri.

© KOHA. Të gjitha të drejtat janë të rezervuara.