Deklarata nga mbledhja e Këshillit të Sigurisë së Kosovës s’flet për asnjë rezultat

13 Janar 2017 - 17:45      

Krejt protokollare e ka përshkruar komunikata qeveritare njoftimin për mbledhjen e Këshillit të Sigurisë së Kosovës, që është udhëhequr nga kryeministri i Republikës së Kosovës, Isa Mustafa, e njëzet e dyta me radhë.

Njoftimi thotë se aty janë shqyrtuar aspekte të ndryshme nga fusha e përgjegjësive ligjore dhe kushtetuese.

Në takim, përveç anëtarëve të rregullt të Këshillit u ftua dhe mori pjesë edhe kryetari i Kuvendit të Republikës së Kosovës, Kadri Veseli.

“Këshilli i Sigurisë së Kosovës ka miratuar Planin e Punës të Këshillit për vitin 2017, si dhe është bërë vlerësimi i sigurisë në vend. Në takim, po ashtu, është përkrahur orientimi për hartimin e Strategjisë së Sigurisë Kombëtare si dhe janë shqyrtuar dokumente të tjera të rëndësishme për organet e sigurisë”, thuhet në njoftim.

Kujtojmë se KTV dhe Koha.net, mbrëmë kishin raportuar se zhvillimet e fundit në vend kanë bërë që institucionet të thërrasin një mbledhje të rrallë të Këshillit të Sigurisë.

KTV-ja mëson se temë kryesore e diskutimit do të jetë evaluimi i gjendjes së sigurisë në vend pas qasjes agresive të Serbisë ndaj Kosovës në javët e fundit duke përfshirë situatën e krijuar për murin në Mitrovicë.

© KOHA. Të gjitha të drejtat janë të rezervuara.