Kosova kërcënohet nga një bllokadë totale e arsimit

13 Janar 2017 - 14:15      

Në bllokadë totale pritet të hyjë sistemi i arsimit në vend, nëse qeveria e Kosovës nuk e ndryshon projektligjin për nivelizimin e pagave në vend, raporton KTV.

Kjo pasi Sindikata e Arsimit është indinjuar nga fakti se nga 11 koeficiente sa janë përcaktuar me këtë projektligj punëtorët e Arsimit janë klasifikuar në fund të tabelës.

Kryetari i SBASHK-ut, Rrahman Jashari në një konferencë të jashtëzakonshme ka thënë se ky projektligj degradon dhe nënçmon profesionin e arsimtarëve duke i renditur ata vetëm një kategori me lartë se punëtoret që kanë të kryer vetëm shkollën fillore.

Bazuar në tabelën e konficenteve në të cilën janë 45 grada arsimtarët e shkollës fillore janë përcaktuar me gradën e shtatë apo me koeficient 1.75 ndërsa ata të shkollës se mesme me 1.9.

Kjo sipas Jasharit nënkupton se mësimdhënësit nuk do të kenë ngritje page por ekziston mundësia që të kenë zvogëlim të saj. Ai ka paralajmëruar se që nga dita e hëne do të kërkojnë nga kryeministri i Kosovës, Isa Mustafa që të tërheq mbrapa ligjin.

© KOHA. Të gjitha të drejtat janë të rezervuara.