Kërkohet zbardhja e shpejtë e sulmit ndaj objektit të Qeverisë në veri [video]

11 Janar 2017 - 19:07      

Një mjet shpërthyes është hedhur mbrëmë në objektin qeveritar të Kosovës në Mitrovicën e Veriut. Policia thotë se ende nuk ka asgjë konkrete sa i përket këtij rasti.

Besim Hoti, zyrtar i Policisë së Kosovës në Mitrovicën e Veriut, ka thënë se dëme në njerëz nuk ka pasur, raporton KTV.

Lidhur me këtë sulm ka reaguar edhe ministrja për dialog, Edita Tahiri, e cila i ka shkruar letër Bashkimit Evropian, duke kërkuar që të ndërhyjë te pala serbe që të qëndrojë në linjë me frymën e dialogut.

BE-ja i ka kthyer përgjigje se mbetet i përqendruar seriozisht në këtë çështje dhe se zhvillimet negative duhet ndalur.

Kryetari i komunës së Mitrovicës së Veriut, Goran Rakiq, nuk ka dashur ta komentojë sulmin.

Ndërsa kryetari i Mitrovicës së Jugut, Agim Bahtiri, e ka dënuar këtë sulm dhe njëherësh, sipas tij, shteti i Kosovës duhet të jetë këmbëngulës në shtrirjen e pushtetit brenda territorit të vet.

Objekti ishte përuruar më 28 nëntor të vitit të kaluar nga ministrja për dialog, Edita Tahiri.  

© KOHA. Të gjitha të drejtat janë të rezervuara.