UP pranohet në Agjencinë Universitare të Frankofonisë

10 Janar 2017 - 21:13      

Universiteti i Prishtinës është anëtari më i ri i Agjencisë Universitare të Frankofonisë.

Pranimi i UP-së në këtë agjenci është një hap shumë i rëndësishëm që do t’i hapë mundësi të reja profesorëve dhe studentëve të tij.

Lajmin e ka bërë të ditur vetë ministri i Punëve të Jashtme të Kosovës, Enver Hoxhaj.

“Jashtëzakonisht i lumtur që edhe zyrtarisht u njoftuam për pranimin e Universitetit të Prishtinës në Agjencinë Universitare të Frankofonisë, dy vite pas pranimit në Frankofoni. Një anëtarësim shumë domethënës që krijon mundësi të shumta për profesorët dhe studentët e Universitetit të Prishtinës për shkëmbim të përvojave dhe dijes me universitetet frankofone”, ka shkruar Hoxhaj në Facebook.

Me anëtarësimin në këtë organizatë, Universitetet e Kosovës, profesorët dhe studentët kosovarë do të kenë mundësi të komunikojnë me universitetet frankofone, t’u qasen dhe të aplikojnë për programe studentore si bursa, programe shkëmbimi etj.

Njëkohësisht, Kosova është ftuar në Asamblenë e Përgjithshme e cila do të mbahet në maj, 2017, në Marok.

Kosova u pranua në Organizatën e Frankofonisë në nëntor të vitit 2014.

© KOHA. Të gjitha të drejtat janë të rezervuara.