QKUK pa buxhet, vështirë se do t’ia dalin të japin shërbime [video]

9 Janar 2017 - 22:21      

As këtë vit, qendra më e madhe klinike në vend nuk do të jetë në gjendje të ofrojë për qytetarët atë për të cilën obligohet.

Shumë shërbime, sikur edhe vitin e kaluar, mbeten të kufizuara, e problem kronik do të jetë mungesa e barnave. Ankesat e qytetarëve vazhdojnë, raporton KTV.

Hiq më mirë nuk do të jetë as ky vit edhe me aparaturat, të cilat në këtë shërbim shpesh gjenden jashtë funksionit për shkak të vjetërsisë.

Por, zyrtarë të kësaj qendre nuk e marrin gjithë përgjegjësinë për vete. Ndonëse janë organizatë e veçantë buxhetore, ata varen nga Ministria e Shëndetësisë, sa i përket furnizimit e investimeve kapitale.

Ministri i Shëndetësisë, Imet Rrahmani, i cili nuk arriti të bindë shefin e tij për të nisur mbledhjen e kontributeve në kuadër të ligjit për sigurime shëndetësore, ka deklaruar se planifikimi për furnizim do të bëhet në bazë të mundësive, e jo sipas nevojave.

Kësaj ministrie do t’i mbetet barrë mbulimi i rasteve nga fondi për trajtime jashtë vendit, i cili për vite me radhë në mungesë të ngritjes së kapaciteteve në institucionet publike, po derdhet në sektorin privat.  

© KOHA. Të gjitha të drejtat janë të rezervuara.