Krejt çka ndodhi në marshin protestues për Ramush Haradinajn sot në Prishtinë [video]

6 Janar 2017 - 19:10      

Tek obelisku, New Born ka qenë takimi i qindra protestuesve të thirrur nga AAK-ja në mbështetje të liderit Ramush Haradinaj.

Me Haradinajn janë solidarizuar edhe zyrtarë të lartë të Vetëvendosjes, Nismës si dhe krerë të organizatës së veteranëve të luftës së UCK-së, raporton KTV.

Fillimisht, një fjalim të shkurtër e mbajti nënkryetari i AAK-së Ardian Gjini.

Nga aty ai dërgoi mesazh për Francën se kjo nuk është drejtësi, ndërsa tha se asnjë nga qeveritë që nga paslufta nuk ka qenë e interesuar t’i ruajë gurët e themelit të shtetësisë, një nga të cilët është edhe Ramush Haradinaj.

Por, para se të nisnin marshin protestues drejt ambasadës franceze në lagjen Arbëria, Gjini e pati edhe një porosi.

Me gjithë temperaturat e ulëta dhe terrenin e vështirësuar nga bora, marshi arriti deri tek ambasada franceze.

Organizatorët kishin planifikuar që aty të ishin vetëm kalimthi dhe marshuesit të vazhdonin drejt pa u ndalur, por jo të gjithë e respektuan këtë.

Shumë zyrtarëve të AAK-së iu desh të bindnin disa nga protestuesit që të vazhdonin rrugën dhe marshin e qetë për t’u kthyer sërish te vendi nga u nisën.

Aty brohoritjet për Haradinajn e UÇK-në vazhdonin.

Megjithatë, gjithçka kaloi qetë dhe marshuesit u kthyen sërish para New Born-it, nga ku, Ardian Gjini u tregoi se në Ambasadën Franceze kanë deponuar një letër përmes së cilës kërkojnë që të përshpejtohen procedurat për lirimin Ramush Haradinajt.

Krejt çka ndodhi në marshin protestues për... by kohanet

© KOHA. Të gjitha të drejtat janë të rezervuara.