Priten fonde për rivitalizimin e kanalit Ibër – Lepenc

6 Janar 2017 - 10:55      

E drejtuar nga kryeministri i Republikës së Kosovës, Isa Mustafa, Qeveria e Republikës së Kosovës mbajti mbledhjen e 126-të me radhë.

Qeveria ka miratuar vendimin për t'i rekomanduar Presidentit të Republikës së Kosovës dhënien e autorizimit ministrit të Financave për nënshkrimin e Marrëveshjes për financim për Projektin për Sigurinë e Ujit dhe Mbrojtjen e Kanalit, ndërmjet Republikës së Kosovës dhe Asociacionit Ndërkombëtar për Zhvillim. Fondet që do të huazohen nga kjo marrëveshje, do të përdoren për financimin e projektit, pra për sigurinë e ujit dhe mbrojtjen e kanalit, përkatësisht revitalizimin e kanalit Ibër-Lepenc dhe ndërtimin e një rezervuari të ujit, i cili do të shërbej për raste emergjence.

Gjatë kësaj mbledhje, janë miratuar edhe dy nismat për lidhjen e "Marrëveshjes mbi punën fitimprurëse të anëtarëve të familjeve të anëtarëve të një misioni diplomatik apo posti konsullor të karrierës", e para ndërmjet Republikës së Kosovës dhe Republikës së Italisë, si dhe e dyta ndërmjet Republikës së Kosovës dhe Shtetit të Panamasë. Këto dy marrëveshje, përveç rëndësisë konkrete dhe përmbajtjes konkrete, ndihmojnë në zhvillimin e mëtejshëm të marrëdhënieve dypalëshe në mes të Kosovës në njërën anë dhe Italisë dhe Panamasë në anën tjetër.