AAK reagon për vendimin për paraburgim të Haradinajt

5 Janar 2017 - 19:52      

Aleanca për Ardhmërinë e Kosovës ka reaguar për vendimin e Gjykatës së Apelit në Francë për mbajtje në paraburgim të ish-kryeministrit të Kosovës Ramush Haradinajn deri në një kërkesë zyrtare nga Serbia për ekstradim.

AAK e cilëson këtë vendim si të pakuptueshëm dhe të papranueshëm.

Kjo parti po ashtu ka kërkuar nga BE që të bëhet trysni ndaj Serbisë që të distancohet nga këto fletëarreste.

Ky është reagimi i AAK-së pas vendimit të autoriteteve franceze:

Vendimi i autoriteteve gjyqësore të Francës që ta mbajnë në paraburgim ish-kryeministrin e Kosovës dhe Kryetar i AAK-së, Ramush Haradinaj, është i pakuptueshëm dhe i papranueshëm.

Marrja e një vendimi të tillë në bazë të një fletarresti të Serbisë, për krimet e pretenduara për të cilat zoti Haradinaj, dy herë është shpallur i pafajshëm nga Tribunali i Hagës, flet për një vendim politik e jo gjyqësor.

Për më tepër mbajtja në paraburgim e zotit Haradinaj, për t’i dhënë kohë Serbisë për të plotësuar dosjet e saj kundër tij, kur Franca e ka njohur pavarësinë e Kosovës dhe kur zoti Haradinaj është shtetas i Kosovës dhe jo i Serbisë, është paradoks.

Ne u bëjmë thirrje autoriteteve të Francës dhe të Bashkimit Evropian, që të ushtrojnë gjithë trysninë e nevojshme ndaj Serbisë, që të distancohet nga ish regjimi i Millosheviqit dhe të heqë dorë nga fletarrestet e kohës së tij.

Ne jemi të bindur se vendimi i sotëm për ta mbajtur në paraburgim Zotin Haradinaj do të korrigjohet shpejt dhe në mbështetje me parimet e drejtësisë ndërkombëtare, ai do të lihet i lirë të vazhdoj punën e tij.

© KOHA. Të gjitha të drejtat janë të rezervuara.