Anita Haradinaj: Kemi marrë disa telefonata, por s’kemi konfirmim për paraburgim

5 Janar 2017 - 19:50      

Anita Haradinaj, bashkëshortja e kreut të AAK-së, Ramusha Haradinaj i ka thënë televizionit publik se janë në pritje të konfirmimit zyrtar rreth vendimit të fundit të Gjykatës së Apelit në Francë.

“Ne jemi në pritje të një konfirmimi zyrtar. Shteti i Kosovës duhet të vetëdijesohet dhe në Bruksel do të duhej të bisedohej për të pastruar këto lista që të mos ketë më çështje të tilla. Kemi marrë disa telefonata por ende nuk kemi konfirmim zyrtar për paraburgimin”, ka thënë ajo.

Kujtojmë se Agjencia e lajmeve, Reuters, para pak çastesh njoftoi se ish-kryeministri Ramush Haradinaj do të mbesë në paraburgim në Francë, deri në një kërkesë zyrtare të Serbisë për ekstradim të tij, duke cituar njoftimin nga Gjykata e Apelit në Francë.

Haradinaj, që u ndal dje në Francë, konsiderohet nga Serbia si kriminel lufte me rolin e tij si udhëheqës i Ushtrisë Çlirimtare të Kosovës.

Ramush Haradinaj u ndalua nga autoritet franceze gjatë ditës së djeshme, në pjesën franceze të Bazelit, bazuar në një urdhërarrest të Serbisë të lëshuar në vitin 2004, kinse për krime lufte.

Haradinaj dy herë është shpallur i pafajshëm nga Tribunali i Hagës ku po gjykohej si i dyshuar për krime lufte.

© KOHA. Të gjitha të drejtat janë të rezervuara.