Shumë kritika për rritjen e pagave të deputetëve, “edhe ashtu të pamerituara” [video]

5 Janar 2017 - 20:16      

Përderisa paga minimale në Kosovë është 170 euro, paga e deputetëve të Kuvendit të Kosovës arrin deri në 1 mijë e 500 euro.

Kur i shtohen edhe mëditjet që deputetët marrin për seanca plenare dhe mbledhje të komisioneve, shpesh paga e tyre kalon shifrën prej 2 mijë eurosh.

Por as kjo shumë si duket nuk po u mjafton, pasi që ditëve të fundit është propozuar që pagat e tyre të rriten, raporton KTV.

Albert Krasniqit nga KDI-ja, që vazhdimisht monitoron punën e Kuvendit, ka thënë se në gjendjen ekonomike, në të cilën është Kosova, të zgjedhurit e popullit nuk i meritojnë as pagat e tanishme.

Kundër rritjes së pagave dhe mëditjeve, është deklaruar deputeti i Vetëvendosjes, Fisnik Ismajli, i cili ka shtuar se për të dhe deputetët tjerë të Vetëvendosjes, një rritje e tillë është e pakuptimtë.

Përkundër pagave të larta, deputetë të partive të ndryshme janë parë shumë shpesh në seanca plenare vetëm sa për t’u nënshkruar për mëditjet e tyre.

© KOHA. Të gjitha të drejtat janë të rezervuara.