Ramush Haradinaj po mbahet në Francë [Raport i KTV-së]

5 Janar 2017 - 19:04      

I shoqëruar nga Policia Franceze, Ramush Haradinaj është paraqitur sot para një prokurori në gjykatën në Calmar të Francës që do të vendosë nëse fletarrestimi i Serbisë për të është valid.

Më parë, ai është vizituar në qytetin e vogël në kufi me Zvicrën nga konsulli i Kosovës në Strasbourg, Edon Cana.

Nga Prishtina, ministri i Jashtëm i Kosovës, Enver Hoxhaj, ka folur në telefon me homologun e tij francez, Jean-Marc Ayrault, për t’i kërkuar lirimin e Haradinajt. “I shpjegova situatën e krijuar dhe absurditetin e këtyre kërkesave të Serbisë që për ne janë të papranueshme. I kërkova mbështetje që z. Haradinaj të lirohet sa më parë dhe besojmë që kjo do të ndodhë”, citohet të ketë thënë Hoxhaj. Ministrja për Dialog, Edita Tahiri, u ka shkruar letër shteteve të Bashkimit Evropian për të kërkuar që të mos marrin parasysh fletarrestimet politike të Serbisë.

Haradinaj u arrestua të mërkurën pasdite në Euro-aeroportin Basel Muluz Freiburg. Ai shoqërohej me pjesëtarë të familjes, kur policia e ndaloi, duke u bazuar në fletarrestimin ndërkombëtar. Serbia ka kërkuar menjëherë ekstradimin e tij në këtë shtet, kërkesë që nuk pritet të merret parasysh.

Ramush Haradinaj po mbahet në Francë by kohanet

© KOHA. Të gjitha të drejtat janë të rezervuara.