Prodhuesit vendorë presin lirime doganore në fushën e prodhimtarisë [video]

4 Janar 2017 - 22:17      

Një numër i madh i prodhuesve janë duke pritur me padurim të shohin nëse kërkesat e tyre për lirimet e pagesës së makinerisë prodhuese, lëndës së parë apo të repromaterialeve do të gjenden në listën e dytë, që do ta publikojë Ministria e Financave.

Sipas prodhuesve, heqja e këtyre barrierave financiare do të ndikojë në rritjen e konkurrencës karshi produkteve që vijnë nga jashtë, raporton KTV.

Shoqatat e biznesit sërish kanë ngritur alarmin për një fushatë të re të nisur nga Maqedonia, për të nxitur prodhuesit e pakët të Kosovës që të transferohen atje, pavarësisht paqëndrueshmërisë politike që e ka ky shtet.

Andaj, sipas tyre, është koha e fundit që të nisë një proces i shpejtë i lirimeve që do t’u ndihmonte këtyre prodhuesve që të vazhdojnë aktivitetin e tyre në Kosovë.

Në Ministrinë e Financave kanë bërë të ditur se lista e përpiluar do të përfshijë sektorë të ndryshëm si: industria e ushqimit, pijeve, metalurgjisë, bujqësisë dhe disa sektorë të tjerë.

Në listën e parë, vlera e lirimeve ka qenë rreth 24 milionë euro dhe ku kanë përfituar mbi 100 kompani të disa sektorëve. 

© KOHA. Të gjitha të drejtat janë të rezervuara.

Prodhuesit vendorë presin lirime doganore në... by kohanet