Ahmeti s’e kupton çfarë detyre tjetër ka deputeti për t’u paguar ekstra për seanca

4 Janar 2017 - 16:19      

Kryetari i Komunës së Prishtinës, Shpend Ahmeti, përmes një reagimi në profilin e tij në Facebook, ka pyetur se si është e mundur që deputetët, përveç pagës, të marrin edhe mëditje për pjesëmarrje nëpër seanca të Kuvendit apo në komisione parlamentare.

Ahmeti këtë fenomen e ka kritikuar pasi që thotë se detyrë e vetme e deputetit është pikërisht pjesëmarrja në seanca dhe në komisione parlamentare.

“Nuk e kuptoj pse deputeti i Kuvendit të Republikës i cili ka pagë shumë të lartë, duhet me marr edhe mëditje për paraqitje në seancë apo komision. A nuk është punë e deputetit me shku në seancë/komision? Në fakt a nuk është kjo puna e vetme që e kanë?”, ka pyetur Ahmeti, raporton Koha.net.

Mediat sot kanë raportuar se deputetët e Kuvendit të Kosovës planifikohet të marrin nga 297 euro, përveç pagës bazë prej 1,488 euro, për çdo pjesëmarrje në seancë të Kuvendit apo në komision parlamentar.

Kështu parasheh ligji i ri për pagat, që pritet të miratohet në Kuvend këtë vit. 

© KOHA. Të gjitha të drejtat janë të rezervuara.