Dhjetra raste mbrëmë në Emergjencë

1 Janar 2017 - 10:48      

Qendra Emergjente e QKUK-së, deri në mesnatë, ka pranuar dhjetëra raste të lëndimeve nga mjetet piroteknike. Mjekët shprehin frikën se numri i pacientëve mund të rritet, pasi presin pacient nga qendrat tjera.

13 vjeçari A. S., ka marrë një lëndim në kokë nga shpërthimi i një mjeti piroteknike. Ai porositi moshatarët që të mos i përdorin mjetet piroteknike.

“Unë isha duke i shikuar fishekzjarrët, kur njëri ndër shokët e mi e ka ndezur atë, e ka ndezur keq dhe ka shpërthyer. Pastaj mbajtësja që ka qenë në raketë, më ka rënë në kokë. Unë i lajmëroj të gjithë moshatarët e mi që mos me përdor mjete piroteknike”, tha ai.

Kurse, specializantja e Emergjencës, dr. Krenare Makolli tha se kanë pranuar dhjetë raste në Emergjencë, të cilat kanë qenë lëndime nga mjetet piroteknike.

“Deri në këto momente sapo flasim diku 10 raste i kemi pranuar, siç po e shihni janë edhe duke ardhur vazhdimisht. Të gjitha janë nga mjetet piroteknike, me lëndime goxha të rënda. Deri në mëngjes sa të kemi një raport, flasim për statistika, pra kemi shumë. Gjithë, popullatës iu kisha thënë të kenë kujdes, e sidomos prindërve, sepse shumicën i kemi mosha të vogla”, tha Makolli.

Në anën tjetër, kirurgu Florent Kavaja, tha se dita ka qenë e qetë, mirëpo në mbrëmje ka filluar një fluks i madh i pacientëve, të cilët kanë qenë të lënduar nga mjetet piroteknike. Ai tha se kanë pasur një rast të rëndë të operimit. Sipas tij, një person ka pasur një lëndim të barkut dhe zorrëve, nga këto mjete, raporton kp.

“Në përgjithësi sot gjatë ditës, dita ka qenë e qetë kurse në mbrëmje kanë filluar një grup i madh i pacientëve të na vijnë. Ndërkohë kemi edhe pacientë që po vijnë prej qyteteve tjera. Sa dola prej sallës, kemi pasur një lëndim të barkut (abdomenit). E kemi futur në sallë në orën 23:40 minuta, ka pas një lëndim të zorrëve. Kemi përshtypjen se në 30 minutshin e parë mund të kemi një numër më të madh të pacientëve”, tha Kavaja.

Doktorët e këtij spitali apelojnë tek qytetarët që të kenë kujdes ndaj përdorimit të mjeteve piroteknike.

Kurse Policia njofton se me rastin e festës së ndërrimit të moteve, kryeqyteti ishte kryesisht i qetë dhe pa incidente të rënda.

Në një deklaratë për media, togeri i Policisë së Kosovës Ibrahim Metolli, përveç urimit për vitin e ri, tha se deri në orën 00:00 gjithçka ka qenë në rregull, ndërsa pas mesnate janë raportuar pesë të lënduar nga mjetet piroteknike, të cilët ishin me lëndime të lehta trupore, si dhe janë raportuar pesë zjarre të cilat janë shkaktuar nga fishekzjarrët.

“Deri më tani ka qenë gjithçka në rregull, deri në ora 00:00, por pas vitit të ri i kemi pesë të lënduar prej fishekzjarrëve, por me lëndime të lehta dhe i kemi pesë zjarre që kanë ra prej fishekzjarrëve, të gjitha këto kanë qenë me mjete piroteknike, jo me mjete të tjera”, tha Metolli.