Gazetarët reagojnë ndaj deklaratave fyese të ambasadores Lama ndaj KTV-së

31 Dhjetor 2016 - 18:22      

Drejtoresha e “Grupit KOHA”, Flaka Surroi, ka reaguar ndaj deklaratave fyese të ambasadores së Kosovës në Itali, Alma Lama, kundër KTV-së.

Surroi, në një postim në Facebook, ka shkruar se do të duhej të vinte shkarkimi i menjëhershëm i Lamës.

“Një vendim shkarkimi i menjëhershëm do të duhej të pasonte. Nëse flasim për parime”, ka shkruar Surroi.

Më pas, Surroi ka folur edhe për padinë e paralajmëruar nga ambasadorja Lama ndaj Grupit KOHA, duke theksuar se do ta presë kundërpadia.

LEXOJENI EDHE KËTË

• Tregtia e Vitit – Alma Lama, Ambasadore e Thaçit në Romë [video]

“Po e lexoj se paska me na paditë në gjyq. Aty do ta presë kundërpadia, sepse posti i ambasadores nuk jep imunitet për shpifjen dhe fyerjen, që janë të dënueshme sipas ligjit, të cilin ajo vetë e ka votuar në Kuvend”, ka shtuar drejtoresha e Grupit KOHA.

Ndaj deklaratave të ambasadores Lama, ka reaguar edhe Kryetari i Asociacionit të Gazetarëve të Kosovës, Shkelqim Hysenaj.

Hysenaj ka thënë se është e ulët dhe e turpshme përdorimi i kësaj gjuhe nga një ambasadore.

LEXOJENI EDHE KËTË

• Ambasadorja Lama fyen gazetarin e KTV-së [video]

“Faktikisht Alma Lama vetvetiu ka rezultuar të jetë pseudogazetare. Ajo që si mbijetoi as joshjes më të vogël politike, paska gjetur kohë që nga largësia të fyej e akuzojë gazetarët në Kosovë. E ulët dhe e turpshme përdorimi i kësaj gjuhe nga një ambasadore”, ka shkruar Hysenaj.

LEXOJENI EDHE KËTË

• AGK-ja reagon ndaj gjuhës fyese të Lamës kundër KTV-së

Gazetari i Kohës Ditore, Besnik Krasniqi, duke përmendur rastin e Xhafer Ahmetit, i cili u shkarkua nga detyra për shkak të fyerjeve ndaj Sali Berishës, ish-kryeministër i Shqipërisë, ka thënë se edhe Alma Lama menjëherë duhet shkarkuar nga pozita e ambasadores.

“Alma Lamën menjëherë duhet shkarkuar nga pozita e ambasadores. Po si Xhafer Ahmetin. Ndryshe, pushtetit i faturohet bashkëpërgjegjësia për fyerje e presion kundër KTV-së”, ka shkruar Krasniqi.

“Ahmeti, sa ishte i ngarkuar me punë në Mal të Zi, pati fyer nëpërmjet Facebook-ut ish-kryeministrin e Shqipërisë, Sali Berisha. Ministri Hoxhaj e pati kthyer menjëherë në Prishtinë. Edhe e pati degraduar”, ka shtuar ai.

“Lama që është ambasadore në Romë, po nëpërmjet Facebook-ut, sot ka fyer rëndë KTV-në, duke e etiketuar si medium të Serbisë. Masa disiplinore duhet marrë ndaj saj. Distancim nga fyerja dhe shkarkim të menjëhershëm”.

Reagim të ashpër ndaj gjuhës së ambasadores Lama pati edhe gazetarja e KTV-së, Arta Avdiu, e cila e ka quajtur ambasadoren “tregtare politike”.

“Padi për dëmtim reputacioni tha ambasadorja. Nisja me padi prej vetes sepse reputacionin tënd e ke dëmtu vet, kështu qysh je, tregtare politike”, ka shkruar Avdiu në Facebook.

© KOHA. Të gjitha të drejtat janë të rezervuara.