Haradinaj uron qytetarët e Kosovës për Vitin e Ri

31 Dhjetor 2016 - 17:13      

Kryetari i Aleancës për Ardhmërinë e Kosovës, Ramush Haradinaj, ka uruar qytetarët e Kosovës, anëtarët dhe simpatizantët e AAK-së për festën e ndërrimit të motmoteve, duke thënë se Kosova ka shpresë.

Në vijim urimi i Haradinajt:

Të dashur qytetarë të Republikës së Kosovës, anëtarë e simpatizantë të AAK-së, të dashur miq,

Viti që po e lëmë pas ishte një vit i sfidave të mëdha për secilin prej nesh. Ishte një vit sfidues për Kosovën dhe demokracinë e saj.

Në planin individual e grupor, si në sport, në kulturë, në art e në sfera të tjera të ndërmarrësisë, u shënuan plot rezultate me të cilat sot mburret Kosova.

Por në planin nacional, Kosova në këtë vit, ka shënuar stagnim, ose edhe më keq kthim mbrapa!

Për të parën herë që nga pavarësia e vendit në vitin 2008, këtë vit është sfiduar integriteti territorial dhe rendi kushtetues i Kosovës, për fatin e keq kjo edhe me ndihmën e Qeverisë.

Sistemi i drejtësisë ka vendnumëruar, shëndetësia është bërë më keq, arsimi nuk është hequr nga lista e problemeve që i ka Kosova, zhvillimi ekonomik ka mbetur veç synim, ndërkohë që është rritur korrupsioni e krimi i organizuar dhe është rënduar jeta e qytetarit.

Në planin ndërkombëtar, Kosova ka qenë më keq se sa në vitin paraprak.

Por falë qytetarisë aktive, është arritur që të mos behët edhe më keq, prandaj heronj të këtij viti, janë qytetarët e këtij vendi dhe askush tjetër!

Unë besoj fuqishëm se viti që po vjen, do të jetë një vit kthese për të gjithë ne, pavarësisht bindjeve politike, fetare e kulturore!

Me besimin në Zot dhe në qytetarët e këtij vendi, Kosova ka shpresë!

Të gjithë juve qytetarë të Kosovës, kudo që jeni, në atdhe e jashtë tij, Gëzuar 2017-ta!

Juaji Ramush Haradinaj 

© KOHA. Të gjitha të drejtat janë të rezervuara.