Mustafa nxjerr bilancin e punëve të kryera e të pakryera më 2016

28 Dhjetor 2016 - 12:40      

Kryeministri i Kosovës, Isa Mustafa, ka mbajtur konferencën përmbyllëse për vitin 2016, duke përmendur sfidat por edhe të arriturat e këtij viti.

Mustafa tha se gjatë vitit 2016, si rezultat i përkushtimit të Qeverisë dhe institucioneve tjera, ka rezultate të prekshme ekonomike, duke përmendur rritjen ekonomike prej 4 për qind, që sipas tij, është më e larta në rajon.

“Vitin e kaluar kishim rreth 18 mijë të rinj të punësuar, ndërsa sivjet presim se do të kemi rreth 20 mijë vende të reja të punës. Në reformat fiskale kemi rezultate të mira, e të cilat janë vlerësuar shumë nga raportet e Bankës Botërore. Gjithashtu, edhe përgatitja e buxhetit prej 2 miliardë eurosh. Kemi miratuar Ligjin për “Trepçën”, që është mirëpritur nga minatorët dhe nga qytetarët tanë”, tha Mustafa, raporton Koha.net.

Kreu i Qeverisë tha se është shtuar edhe konsumi i produkteve vendore, dhe potencoi se qeveria e tij ka përkrahur shumë bujqësinë e vendit.

Ndërkohë, ai foli edhe projektet infrastrukturore, duke përmendur rrugën për Shkup, për të cilën tha se është punuar shumë, pasi konsiderohet si arterie e rëndësishme ekonomike.

“Është punuar në autostradën për Pejë, për Mitrovicë, dhe planifikojmë të nisim punët për ndërtimin e autostradave për Gjilan dhe Podujevë. Janë bërë të gjitha përgatitjet për fillimin e rikonstruktimit të hekurudhës dhe zgjerimin e hyrje-daljeve nëpër të gjitha qytetet më të mëdha të Kosovës”, theksoi kreu i ekzekutivit.

Tutje, Mustafa ka përmendur edhe anëtarësimet e vendit dhe institucioneve sportive nëpër organizata ndërkombëtare.

“Për sa i përket liberalizimit të vizave, Qeveria e Kosovës i ka përmbushur të gjitha kushtet, përveç përcaktimit të vijës kufitare me Malin e Zi”, tha më tutje Mustafa.

Ai tha se testi i PISA-s ka qenë kërkesë e jona në mënyrë që të dimë se ku jemi në këtë aspekt.

“Pas marrjes së rezultateve, tani kemi një pasqyrë të qartë se ku duhet të orientojmë përmirësimet në periudhën e ardhshme dhe do të orientojmë të gjitha energjitë në përmirësimin e nivelit të arsimit”, theksoi kryeministri.  

Sfida kryesore, tha Mustafa, është çështja e demarkacionit, “e cila po bëhet krejtësisht për interesa personale”.

“Ne do të vazhdojmë të punojmë fuqishëm që kjo të zhbllokohet dhe në fillim të vitit të ardhshëm të kemi mundësi ta kalojmë demarkacionin dhe të hiqen vizat për qytetarët tanë”, tha ai.

Tjetër sfidë, tha Mustafa, është edhe problemet e improvizuara nga ana e Serbisë në veri të vendit, në arsim e në shëndetësi, sidomos ngritja e shërbimeve shëndetësore.

© KOHA. Të gjitha të drejtat janë të rezervuara.