Veteranët e UÇK-së në Jabllanicë për të nderuar dëshmorët e kombit

25 Dhjetor 2016 - 18:01      

Sot në Kompleksin Memorial të Dëshmorëve të Kombit në Jabllanicë të Gjakovës, janë organizuar homazhe në kujtim të heroizmit të Ushtrisë Çlirimtare të Kosovës, si dhe është zhvilluar një takim me veteranë të të gjitha degëve, duke përfshirë atë të Zonës Operative të Dukagjinit.

Ish-zëvendëskomandanti i Shtabit Operativ të Dukagjinit në Jabllanicë, tash deputet i AAK-së Lahi Ibrahimaj, ka thënë se është i nderuar se “në këtë vend nisi dhe përfundoi lufta çlirimtare”.

Ai ka falënderuar bashkëluftëtarët e tij që kanë zgjedhur pikërisht fshatin Jabllanicë për të përmbyllur aktivitetet e tyre.

‘’Vendi ku u nis dhe mbaroi lufta është këtu me datën 17 maj në Shqiponjë. Faleminderit që jeni përcaktu me i mbyll këtu aktivitetet veteranë’’, tha Brahimaj.

Ndërsa ish luftëtari i UÇK-së, Ali Geci, tha se Jabllanica ishte bazament i luftës së UÇK-së dhe mijëra luftëtarëve të saj.

Ai tha se veteranët e kësaj ane, janë të bashkuar më shumë sot në paqe, sesa dje në luftë.

Për homazhe prezent ishte edhe kryetari i OVL-UQK-së-Dega në Gjakovë, Sadri Hoxha, i cili tha se ky takim ka mbledhur veteranë të të gjitha degëve, raporton KSP.

Këto homazhe janë mbajtur për fundvit, në kujtim të heroizmit të Luftës së UÇK-së dhe heronjve të rënë.

© KOHA. Të gjitha të drejtat janë të rezervuara.