Veseli: Marrëveshjen për murin e bëri Bahtiri, mora telefonatë nga Brukseli

24 Dhjetor 2016 - 00:52      

Një fjalim të gjatë e ka mbajtur në formë të replikave me deputetët e opozitës, kreu i Kuvendit të Kosovës e njëkohësisht edhe i Partisë Demokratike të Kosovës, Kadri Veseli, kur seanca për murin në pjesën veriore të Mitrovicës ka hyrë në orën e tetë.

Ai ka zbuluar se ka marrë një telefonatë direkte nga Brukseli, siç ka thënë nga zyrtarë të lartë të BE-së, duke i thënë se ka një marrëveshje për një mur në Mitrovicë dhe se partia e tij duhet ta përkrahë.

Për këtë ai e ka akuzuar kryetarin e Komunës së Mitrovicës së Jugut, Agim Bahtiri për marrëveshje me Goran Rakiqin. Ka përmendur edhe një paraqitje publike të tij, më 9 dhjetor kur kishte thënë, siç e citoi Veseli “kemi bërë marrëveshje fenomenale për murin me shkallë 80 centimetra ”.

Vetëvendosjen e ka akuzuar për hipokrizi, e për patriotizëm të rrejshëm, raporton Koha.net.

“Jeni bërë çerdhe pro-jugosllave. Keni gjet një mënyrë vetëm me fy e me fy. Po bëni lojën e tjetër kujt. Çka na kishit bë mu edhe Isa Mustafës sikur të kishim bërë marrëveshje koalicioni me Agim Bahtirin në ditën e ndërtimit të murit, kushedi se çfarë na kishit bërë”, ka thënë Veseli.

© KOHA. Të gjitha të drejtat janë të rezervuara.