Rrobat dhe aksesorët e të vrarëve po shkatërrohen në oborrin e ILM-së [video]

22 Dhjetor 2016 - 19:31      

Mbi një mijë rroba e aksesorë të të vrarëve dhe të të zhdukurve të identifikuar kanë nisur të shkatërrohen dhe krejt kjo për shkak se vazhdojnë të mbahen në ambient gjysmë të hapur në oborrin e Institutit të Mjekësisë Ligjore, raporton KTV.

Institucionet përgjegjëse vazhdojnë të mos ofrojnë kurrfarë përkujdesje për to, që do të duhej të ruheshin si dëshmi për luftën e kaluar.

Komisioni Qeveritar për persona të pagjetur, derisa po pret caktimin e një lokacioni për ndërtimin e një kompleksi, ide kjo e prezantuar vite më parë, ka siguruar një kontejner nga ish-misioni i UNMIK-ut për t’i vendosur rrobat.

Por, kryetari i këtij komisioni thotë se ende nuk kanë mundur ta gjejnë një lokacion për t’i vendosur ato, derisa po presin një përgjigje nga Ministria e Punëve të Brendshme.

Kohavisioni ka kërkuar përgjigje nga ana e Ministrisë së Punëve të Brendshme por nuk ka marrë ndonjë përgjigje. Megjithëse vite më parë u nënshkrua një memorandum ndërmjet drejtuesve të Komisionit për persona të pagjetur dhe atyre të Muzeut të Kosovës për transferimin e këtyre gjërave në këtë muze, një gjë e tillë nuk ka ndodhur.
 

© KOHA. Të gjitha të drejtat janë të rezervuara.