Simiq: Srpksa do të vazhdojë kundërshtimin e Ligjit për Trepçën

22 Dhjetor 2016 - 11:24      

Shefi i grupit parlamentar të Listës Serbe, Sllavko Simiq, ka thënë se deputetët serbë do të vazhdojnë kundërshtimin e Ligjit për Trepçën, pasi sipas tij, miratimi i këtij ligji është bërë pa konsultimin me komunitetin serb.

“Srpska do të vazhdojë të jetë kundër Ligjit Për Trepçën sepse është bërë pa konsultimin e serbëve, prandaj nuk kemi pasur mundësi t’i mbrojmë interesat tona. Këto ligje nuk janë të mira për komunitetin serb. Në kuvend jemi për të mbrojtur interesat tona dhe vetëm me punë e sinqeritet mund t’i kalojmë problemet që kemi dhe kthimin e besimit”, ka thënë Simiq.

Simiq në fjalimin e tij në Kuvendin e Kosovës ka thënë se Serbia me kryeministër Aleksandar Vuçiqin po vazhdon të respektojë gjitha marrëveshjet e arritura në Bruksel mes Kosovës dhe Serbisë.

“Do të vazhdoj të bëj presion për realizimin e interesave tona dhe marrëveshjeve të Brukselit. Këto janë përparësitë tona për të ardhmen dhe forcat e koalicionit t’i respektojnë marrëveshjet dhe të këmbëngulim në realizimin e marrëveshjes së Brukselit për formimin e Asociacionit të Komunave Serbe. Presim të realizohen marrëveshjet me koalicionin qeverisës. Serbia e Aleksandër Vuçiqit po i respekton gjitha marrëveshjet e Brukselit. Sot po votojmë buxhetin dhe presim investime në komunat me shumicë serbe. Është momenti i fundit që të fillohet AKS-ja dhe çelësi i mbetjes së serbeve në Kosovë është Asociacioni”, ka thënë Simiq.

Shefi i grupit parlamentar ka konfirmuar se Lista Serbe ka përjashtuar dy deputetë nga grupi parlamentar. 

© KOHA. Të gjitha të drejtat janë të rezervuara.