Roli i UNICEF-it për shëndetësinë në Kosovë, i pazëvendësueshëm

21 Dhjetor 2016 - 15:36      

Prishtinë, 21 dhjetor - Ministri i Shëndetësisë Imet Rrahmani priti sot u.d të shefit të UNICEF-it në Kosovë, z. James Mugaju, me të cilin bisedoi për bashkëpunimin në shëndetësi.

Ministri Rrahmani tha se bashkëpunimi me UNICEF-in ka luajtur rol të rëndësishëm në realizimin e objektivave të MSH-së, për çka jemi edhe falënderues, sidomos në ngritjen e cilësisë së kujdesit shëndetësorë të nënës dhe fëmijës, projektin e vizitave shtëpiake shëndetësore dhe për kontributin në realizimin e suksesshëm të programit të imunizimit në vendin tonë, transmeton Koha.net.

Ministri Rrahmani ka njoftuar z. Mugaju për miratimin e Strategjisë sektoriale shëndetësore nga Qeveria e vendit, “e cila do të reflektojë dukshëm në ngritjen e përgjegjësive si dhe do të lehtësojë realizimin e objektivave të MSh-së për katër vitet e ardhshme”.

U.D. shefi i Unicef-it, z. Mugaju njoftoi ministrin Rrahmani për angazhimin e ekspertëve ndërkombëtarë në IKSHPK nga UNICEF, të cilët janë duke dhënë kontributin e tyre profesional tashmë e sa ditë, sidomos në planifikimin e programit të imunizimit.

Ai më tutje ka shprehur gatishmërinë për forcim të bashkëpunimit bazuar në Strategjinë sektoriale shëndetësore 2017-2021 të miratuar ditë më parë nga Qeveria e Republikës së Kosovës.

© KOHA. Të gjitha të drejtat janë të rezervuara.