Maqedonia drejt një krize të thellë

20 Dhjetor 2016 - 11:57      

Pas zgjedhjeve të 11 dhjetorit në Maqedoni vazhdon të mbretërojë kaosi rreth formimit të institucioneve të reja demokratike.

Njëra nga mundësitë është formimi i një qeverie të dobët mes VMRO-së dhe BDI-së, ndërsa varianti më i rrezikshëm është mosnjohja e rezultateve.

Xhelal Neziri, drejtues i Qendrës për Gazetari Hulumtuese SCOOP, vlerëson se vendi po hyn në një krizë edhe më të thellë. Kjo, siç thotë, veçanërisht pas qëndrimit të shprehur nga ana e kryetarit të VMRO DPMNE-së, Nikolla Gruevski, se nuk do të njeh rezultatin e dalë nga rivotimi nëse këtë e mundëson Gjykata Administrative.

Neziri në këtë drejtim nuk përjashton mundësinë që Gruevski të mos certifikojë mandatet për deputetë të partisë së tij dhe të bojkotojë punën e Kuvendit.

“VMRO DPMNE dhe Gruevski dëshiron të dërgojë një sinjal se çdo qeveri që do të përbëhej pa VMRO DMNE-në do të ishte një qeveri jo stabile pasi me mos njohjen e institucioneve kjo parti dëshiron që aktivitetin e saj kryesor ta zhvendos në rrugë pra konflikte që do të shkaktonin ato protesta”.

Mendoj se zgjedhjet në vend se të paraqisninzgjidhje tëkrizës ata po shëndërohen në një derë për futje të një faze të re të krizës në të cilën për një kohë të gjatë ndodhet Maqedonia” thotë Neziri për Rel.

Për të gjithë njohësit e çështjeve politike si opsione më të realizueshme mbetet varianti I formimit të një qeverie të zgjeruar ku do të përfshiheshin të gjitha subjektet politike me një marrëveshje paraprakisht të arritur rreth obligimeve që duhet të realizojë ajo përbërje qeveritare.

Varianti i dytë shihet mundësia e krijimit të një qeverie në nivel ekspertësh e cila do të ketë për detyrë ta përgatis vendin për zgjedhje të parakohshme parlamentare bashkë me ato lokalet që pritet të realizohen në pranverë të vitit të ardhshëm.