Finlanda mbështet hetimet për fatin e viktimave të luftës në Kosovë

19 Dhjetor 2016 - 15:23      

Finlanda i ka dhënë mbështetje hetimeve për fatin e të zhdukurve dhe krimeve në luftën e Kosovës, transmeton Koha.net.

EULEX-i dhe autoritet serbe që disa vite janë duke hetuar për krimet e bëra gjatë luftës në Kosovë.

Në lidhje me këtë EULEX-i dhe Komisioni serb për Refugjatët dhe Migrantët po kryejnë gërmime për të kërkuar për mbetjet e njerëzve që u ekzekutuan apo janë zhdukur për shkak të këtyre krimeve.

Me qëllim që t’i jep mbështetjen finlandeze në këtë aspekt, ambasadori Pertti Ikonen nënshkroi një marrëveshje me përfaqësuesit e Komitetit serb për Refugjatët dhe Migrantët më 15 dhjetor 2016 në Beograd, bëri të ditur përmes një komunikate Ambasada e Finlandës në Kosovë.

Mbi 1.600 persona ende mungojnë si pasojë e luftës në Kosovë. Me mbështetjen e Ministrisë së Punëve të Jashtme të Finlandës gërmimet e filluara më herët janë duke vazhduar.

Qeveria e Finlandë e konsideron me rëndësi të madhe që Kosova dhe Serbia, në bashkëpunim me EULEX-in, të vazhdojnë hetimet e krimeve të luftës dhe fatit të personave të zhdukur, dhe se dy vendet të arrijnë bashkëpunim bilateral gjyqësor dhe policor sa më parë.

Aktualisht mungesa e bashkëpunimit ndemjet Kosovës dhe Serbisë është faktori kryesor që pengon këto hetime.

“Hetimet mbi fatin e personave të zhdukur është jetike për familjet e tyre”, ka thënë Anne Huhtamäki, ambasadorja finlandeze në Kosovë.

Detyrat e EULEX-it përfshijnë forcimin e sundimit të ligjit në Kosovë dhe hetimin e krimeve të luftës. Ka disa ekspertë finlandezë që punojnë për EULEX-in në sektorët e gjyqësorit, policisë, mjekësisë ligjore dhe shërbimet korrektuese.

© KOHA. Të gjitha të drejtat janë të rezervuara.