Kosova kërkon nga BE rikonfirmim të perspektivës europiane

16 Dhjetor 2016 - 15:06      

Bruksel, 16 dhjetor - Zëvendësministrja për Integrim Evropian, znj. Anila Statovci-Demaj ka zhvilluar një vizitë disa ditore në Bruksel, ku ka bashkëkryesuar nënkomitetin e parë për Marrëveshjen e Stabilizim Asocimit dhe ka takuar përfaqësues të nivelit të lartë nga institucionet e Bashkimit Evropian.

Zëvendësministrja Statovci-Demaj takoi drejtoreshën për Ballkan Perëndimor në drejtoratin e Përgjithshëm për Zgjerim, znj. Genoveva Ruiz Calavera, drejtoreshën për Evropë Perëndimore, Ballkan Perëndimor dhe Turqi, znj. Angelina Eicchorst. shefin e Njësisë për Kosovë në Komision Evropian, z. David Cullen, dhe përfaqësues të tjerë institucional.

Gjatë këtyre takimeve njoftuese, zëvendësministrja dhe bëshkëbiseduesit nga institucionet evropiane reflektuan mbi deklaratën e presidencës së BE-së për vendet e zgjerimit, të publikuar këtë javë, si dhe diskutuan për çështjet prioritare të ndërlidhura me procesin e integrimit evropian, përfshirë përfundimin e shpejtë të procesit të liberalizimit të vizave, zbatimin e Marrëveshjes për Stabilizim Asocim, me prioritet në masat e identifikuara në agjendën e reformës europiane, asistencën financiare të BE-së, zhvillimet politike në vend, marrëdhëniet rajonale dhe çështje tjera të interesit të përbashkët.

Zëvendësministrja Statovci-Demaj e nënvizoi nevojën për mbështetjen e përfaqësuesve institucionalë të BE-së në përfundimin e shpejtë të procesit të liberalizimit të vizave, si dhe kërkoi që të rikonfirmohet perspektiva evropiane e vendit.