Të akuzuarit në rastin “Toka” thonë se janë “të pafajshëm”, Syla i prangosur në gjykatë [video]

15 Dhjetor 2016 - 19:21      

Të gjithë të akuzuarit në rastin “Toka”, përfshirë Azem Sylën, janë të deklaruar të pafajshëm për 46 pikat e aktakuzës, me të cilat ngarkohen.

Vazhdimi i seancës është bërë pa praninë e dy të akuzuarve, për të cilët Gjykata ende nuk ka marrë vendim nëse do ta veçojë procedurën ndaj tyre ose jo.

Prokuroria i ngarkon me 46 pika të akuzës, përfshirë atë të krimit të organizuar e të përfshirjes në grup të organizuar kriminal.

Ish-komandanti i UÇK-së, Azem Syla, që kësaj radhe kishte shkuar në gjykatë me pranga në duar, ka deklaruar se nuk e ndien veten fajtor për asnjë nga pikat e aktakuzës.

Ish-deputeti i PDK-së konsiderohet si udhëheqës i grupit të organizuar kriminal bashkë me Shpresim Ukën dhe të cilët kanë kryer krime që lidhen me pronat në Kosovë deri në vitin 2013. Të pafajshëm janë deklaruar edhe të akuzuarit e tjerë.

Seanca ka qenë vazhdim i asaj të së martës, e cila ishte shtyrë për shkak të mungesës së një të akuzuari. Gjyqtari u ka dhënë kohë palëve që brenda 30 ditëve të paraqesin me shkrim kundërshtimet për aktakuzën.

© KOHA. Të gjitha të drejtat janë të rezervuara.