MPJ konfirmon kontrabandimin e Gjuriqit në veri, nis notë proteste në BE

15 Dhjetor 2016 - 17:43      

Ministria e Punëve të Jashtme e Kosovës ka konfirmuar se i ashtuquajturi drejtor i Zyrës për Kosovë në Qeverinë e Serbisë është kontrabanduar në veri me anë të një autoambulance.

MPJ e ka konsideruar si të papranueshme sjelljen e Marko Gjuriqit, i cili hapur ka provokuar sot në veri institucionet e Kosovës dhe autoritetet e sigurisë, transmeton Koha.net.

“Hyrja ilegale në Kosovë është kundër marrëveshjes për vizitat e ndërsjella të arritur në Bruksel ndërmjet Kosovës dhe Serbisë, të cilat duhet të aprovohen apo ndalohen nga institucionet e të dyja shteteve të paktën 24 orë më herët. Kjo sjellje është kundër frymës së dialogut dhe bashkëpunimit rajonal”, thuhet në reagimin e Ministrisë së Punëve të Jashtme.

MPJ më tej njofton se ka nisur tashmë një notë proteste BE-së dhe të gjitha institucioneve ndërkombëtare për këtë sjellje të papranueshme të Gjuriq dhe ka koordinuar hapat e mëtejshëm me institucionet relevantë në Kosovë.

“Kjo përpjekje e tij i cili u kontrabandua në Kosovë duke u maskuar në një autoambulancë flet për qasjen dëshpëruese që ka vendosur ta ndjek në karrierën politike”, ka përfunduar MPJ.

© KOHA. Të gjitha të drejtat janë të rezervuara.