Haradinaj: Në Mitrovicë kemi nevojë për ura e jo për mure

15 Dhjetor 2016 - 13:07      

Kryetari i Aleancës për Ardhmërinë e Kosovës, Ramush Haradinaj ka vizituar sot Mitrovicën, përkatësisht urën mbi Ibër, ku në vend të rehabilitimit të saj, por ndërtohet murë që do të ndaj.

Në një deklaratë pas kësaj vizite, ai thekson se në Mitrovicë kemi nevojë për ura dhe jo për mure që ndajnë.

Më poshtë deklarata e plotë e Ramush Haradinajt:
Sot e vizitova Mitrovicën dhe e pash murin që ishte ndërtuar aty. Është e pakuptueshme se si mendësia provinciale e nacionaliste, në këtë kohë ndërton mure ndarëse. Më mirë do të ishte që ato mjete të ishin shpenzuar në ndërtimin, edhe të një ure në Mitrovicë, e cila do t’i duhet atij qyteti, atij komuniteti.

Prishtina dhe Mitrovica, kanë nevojë të ndërtojnë më shumë ura, sepse fati ynë i përbashkët, janë urat e jo muret.

Kjo një dhe e dyta, Qeveria e Kosovës nuk mund të justifikohet me asnjë gjë, pse ishte shkaktari kryesor i ndërtimit të këtij muri, që tani po na harxhon kohë, nerva e mund që ta rikthejmë në një situatë të pranueshme.

Ndërtimi i mureve nuk mund të jetë as në interesin e vetë komunitetit serb atje. Ata duhet të mos bien pre e politikave ekspansioniste e nacionaliste të Beogradit, apo të kujtdo tjetër, sepse e ardhmja e tyre është në Kosovë!

Kosova është një dhe e pandashme.

© KOHA. Të gjitha të drejtat janë të rezervuara.