Zyra për përgjegjësi të gjyqtarëve e prokurorëve, organ i pavarur

14 Dhjetor 2016 - 12:11      

Prishtinë, 14 dhjetor – Ministrja e Drejtësisë e Republikës së Kosovës, Dhurata Hoxha, ka marrë pjesë sot në tryezën, e organizuar nga ministria që e drejton, për Projektligjin mbi përgjegjësinë disiplinore për gjyqtarë dhe në këtë veprimtari kanë marrë pjesë zëvendëskryeministri, Hajredin Kuçi, kryeprokurori i Shtetit, Aleksandër Lumezi, ambasadori i SHBA, Greg Delawie, shefja e Zyrës së BE-së në Kosovë, Nataliya Apostolova si dhe përfaqësues të tjerë të institucioneve vendore, ndërkombëtare dhe përfaqësues të shoqërisë civile.

Në funksion të ngritjes dhe avancimit të mëtejmë të efikasitetit në drejtësi janë marrë nisma për ndryshime në këtë fushë, transmeton Koha.net.

Sistemi i disiplinimit të gjyqtarëve dhe prokurorëve, krahas çështjeve të tjera që janë ndryshuar së fundmi, siç është buxheti, vlerësimi i performancës së gjyqtarëve dhe prokurorëve dhe çështje të tjera, janë në funksion të këtij qëllimi. Në këtë drejtim, çështja e disiplinimit të gjyqtarëve, përkatësisht prokurorëve dhe veçmas hetimi për shkelje disiplinore, është njëra nga çështjet e rëndësishme.

“Me qëllim të reflektimit sa i përket kësaj çështje si dhe në koordinim dhe konsultim me përfaqësuesit e Këshillit Gjyqësor, Këshillit Prokurorial, Zyrës së Kryeprokurorit të Shtetit, Zyrës së Prokurorit Disiplinor, dhe me mbështetje të partnerëve tanë ndërkombëtarë, kemi hartuar draftin e Projektligjit për përgjegjësinë disiplinore për gjyqtarë dhe prokurorë, sipas të cilit Zyra për Përgjegjësi Disiplinore parashihet të jetë si organ i pavarur i administratës shtetërore nën ombrellën e Ministrisë së Drejtësisë, në mënyrë që të sigurohet funksionimi dhe efikasiteti i saj i pavarur” tha ministrja Hoxha.

Ajo theksoi se përcaktimi i Zyrës në kuadër të Ministrisë së Drejtësisë, si institucion plotësisht i pavarur në ushtrimin e funksioneve të saja, pos që është bërë në konsultim me KGJK, KPK, dhe ZPD, konsiderojmë së i ndihmon edhe procesit të balancimit të pushteteve, veçmas sa i përket kësaj çështje të hetimit dhe vendimmarrjes për disiplinimin e gjyqtarëve dhe prokurorëve.

“Ministria e Drejtësisë dhe unë si ministre e saj, jemi thellësisht të përkushtuar që organeve të cilat merren me zbatimin e ligjit t’u mundësohet infrastrukturë adekuate ligjore që puna e tyre të jetë sa me efikase dhe efektive si dhe krahas kësaj të ngrihet niveli i performancës së institucioneve të drejtësisë. Krahas kësaj edhe ngritja e transparencës dhe llogaridhënies, si çështje kyçe të cilat do të ndikojnë edhe në rikthimin e besimit të qytetarëve tanë në institucionet e drejtësisë” , theksoi ministrja Hoxha. 

© KOHA. Të gjitha të drejtat janë të rezervuara.